Giovanni Abath 7.1: Un artista ku ta konta e historia di Kòrsou

Giovanni Abath a nase dia 23 di yanüari 1974 na Kòrsou. El a krese na Bandabou, kaminda desde chikitu e tabatin hopi kreatividat i gustu pa traha kos ku su mannan. Awe, e ta konosí komo un artista i eskultor outodidakta, bou di su nòmber artístiko 7.1. E nòmber aki ta un representashon numériko di su inisialnan, G.A.

Su kaminda di mucha kreativo pa artista

Giovanni no a sigui un formashon artístiko formal. El a desaroyá su talento dor di ekspermentá, observá i siña pa su mes. Durante un parti di su bida, el a traha den industria, inkluyendo na refineria. Su eksperensia ku metal a habri un mundu nobo di posibilidat pa dje.

Poko poko, el a kuminsá traha ku hero, staal, palu i otro material. Promé, el tabata traha dekorashon, kreashon pa karnaval i diferente opheto. Mas despues, el a sigui desaroyá su talento te bira un eskultor ku un estilo propio.

Arte ku ta konta e historia di Kòrsou

Pa Giovanni, metal no ta solamente un material. E ta un manera pa ekspresá idea tokante historia, identidat, libertat, union i desaroyo humano.

Un di su trabounan konosí ta History in Motion, ku el a krea na 2018 pa e selebrashon di Dia di Bandera di Kòrsou. E obra ta konsistí di ocho parti di metal rondó di e mástil di bandera na Plasa Brion. E eskudonan ta simbolisá diferente parti di e historia i desaroyo di Kòrsou.

Landhuis Morgenster i e 7.1 Experience

Giovanni i su esposa, Angelica, a duna un nobo bida na Landhuis Morgenster. Nan a traha riba e restorashon di e edifisio históriko i a krea un lugá kaminda arte, kultura i historia di Kòrsou ta topa otro.

Na sèptèmber 2023, nan a habri e 7.1 Experience, kaminda bishitantenan por mira su eskulturanan i konosé mas di su filosofia artístiko.

Su arte ta biaha pa mundu

E trabounan di Giovanni por mira na diferente lugá na Kòrsou, entre otro na Plasa Brion, Blue Bay i Landhuis Morgenster.

Na 2026, su eskultura The Colors Behind the Flowers a haña atenshon internacional despues di selekshoná pa e programa Royal Caribbean Artist Discovery. E obra a haña un lugá riba e barku Legend of the Seas.

Kiko nos por siña di Giovanni?

E historia di Giovanni Abath 7.1 ta siña nos ku no tur kaminda pa un sueño ta kuminsá den un skol di arte. A veces, e ta kuminsá ku un idea, un par di man, kurashi i gana di siña.

Mensahenan pa nos alumnonan: Kere den bo mes, desaroyá bo talento i no laga otro hende su duda para bo. Ku pasenshi, kreatividat i dedikashon, bo por logra kos bunita i hasi algu balioso pa bo komunidat.